《冇Daddy就要學慳錢！》
其實窮生我一早已經想將我既理財哲學同大家分享，奈何工作又忙，放工後比較懶去管理一個page，所以一直沒有將件事變成行動。
呢2-3年窮生既女朋友話不如將我寫o既野放上網比人睇，唔好浪費左我Ｄ咁古怪既生活體驗。咁我就真係承諾左佢，不定時會寫下文，主題有時可能天南地北，不過主要都係環繞慳錢、精明消費、理財、年青人如何向上流等等，希望過下癮又可以同大家交流下，Update下自己既知識！
講返正題，正如條題目所講今次我係想講慳錢。你可能會話：「喂！你男人老狗唔講買樓唔講買股票，講埋Ｄ十元八塊既牛頭角師奶慳錢大法？」非也！係我既理財哲學入邊，慳錢並唔係一套武功。而係一種內功，一種態度。有好多人搵到唔少錢，一個月人工十萬八萬，但係點解佢地過緊既生活，會係一個月入三四萬既人既生活？就係識得搵，唔識得駛！唔係話過得唔好，而係好唔抵囉！而識得駛，都係慳錢既一部份。又講返Ｄ落地Ｄ既例子。我諗好多三十歲左右既打工仔，月入唔夠３０Ｋ，甚至唔過２０Ｋ都唔奇！面對家用同租金，今時今日車費又貴，ＬＵＮＣＨ出街食個飯都＄４０－５０既時候。萬一你冇返個Daddy傍身 ，攞住果２萬幾蚊人工，真係夠駛？
我完全同意主動去增加收入先係長遠「脫貧」（容許我用呢個詞）既方法。但係買樓買股票甚至創業，都需要先儲到一筆足夠既錢。要做呢一步就先要識得慳錢儲錢！當你一個月慳多＄１０００，你一年就多萬二蚊，十年就係十二萬架喇！一個月儲＄１０００係一個咩概念？就只係每天用少３２蚊。當然你需要慳到咩程度，就要睇下你目標係幾高喇！但我第一個俾大家既貼士係，好多人因為出緊月薪，所以睇既數自然會以月計。筆者提提你嘗試下將所有數以年計，你會發現，原來小至每朝用黎回魂果杯咖啡都駛你唔少錢。
唔知大家有冇用一D計算支出既APPS或者係軟件去記錄自己既支出狀況？窮生覺得呢個係一個良好既習慣。原因唔係因為佢可以幫你儲多好多錢，而係可以令你更了解你自己，從而定出一個改善自己生活既方案。未試過既朋友不妨試下，以我為例，我唔太鍾意坊間Ｄ ＡＰＰＳ，因為我覺得佢唔係好方便重溫一Ｄ舊數。所以我用既係自製既ＥＸＣＥＬ表，而個表係長期用Google Drive隨時隨地入數同Check數。如果你地都有好好既記錄方法，都可以同我交流下，等我都試用下。
係呢篇文我就先當大家係入門級，未有記數既經驗，咁我就問問大家，你對於你一個月洗幾多錢食飯有冇概念？你一個月搭左幾多錢車你又知唔知呢？其實呢ｄ數都可以令你更了解自己係一個點洗錢既人。所以你記數既時候，最好就係記住每一個細項（例如：車費，ｌｕｎｃｈ，應酬既費用）佔你一個月總開支係幾多。當你分析完呢Ｄ數據之後，你就可以針對呢ｄ大駛既地方作出改善。例如你ｌｕｎｃｈ既費用（一般黎講如果你５天工作，一個月會返２２日工，以平均一個ｓｅｔ＄４０計，就是＄８８０），鬆少少姐係話你唔過＄１０００的話都已經係好好既開始。如果你發現你原來用左＄２０００，咁你就知道自己今個月食好左唔少。如果想儲錢，就應該由呢方面先開刀喇！而有ｄ方面係唔開得刀，例如車費，如果你要過海返工，你一日車費係咁多就係咁多，唔通你游過海咩！所以係你記數既過程，其實你會了解到自己最可以減既係咩開支。
可能你會覺得咁記數法好煩，不過你可以學到好多野，嘗試下係當中搵Ｄ樂趣！好似窮生我咁，我雖然從事設計行業，但係我好鍾意數字。當你完成你既第一個支出年表，你搵你最慳同最大駛果個月作比對，你就可以大約知道你平均應該駛幾多錢，如果一年要ｃｕｔ ２０％支出你會ｃｕｔ ｄ咩，其實都好好玩！當你去到我咁既熟練程度果陣，基本上你一講你條數我就知你既消費模式既，甚至係性格，優點缺點都不難推算得到的！不如今日開始，你又試下玩下，話唔定你會改變你日後行既路！
Search